गैडा संरक्षण फुटबल प्रतियोगिता चलिरहँदा दिनहुँ सोही क्षेत्रमा गैँडाको मृत्युः आज पनि दुई गैँडा मृत फेला

कावासोती । नवलपुरको मध्यविन्दु नगरपालिकामा गैँडा संरक्षण फुटबल प्रतियोगिता चलिरहँदा सोही पालिकामा दैनिक रुपमा दुर्लभ एक सिङ्गे गैँडा मृत अवस्थामा फेला परेको छ ।
मङ्गलबार (आज) पनि दुई वटा गैंडा मृत अवस्थामा फेला परेका छन् । हिजो मात्रै मध्यविन्दु–१२ मा पोथी गैंडा मृत फेला परेका थियो । चितवन राष्ट्रिय निकुञ्जका सुचना अधिकारी अविनाश थापा मगरले दिनुभएको जानकारी अनुसार आज फेला परेका दुई वटै गैंडा बच्चा गैंडा हुन । सडेगलेको अवस्थामा फेला परेकाले लिगको पहिचान हुन नसकेको मगरले बताउनुभएको छ ।
चितवन राष्ट्रिय निकुञ्ज अन्तरगत पर्ने पश्चिम सेक्टरको  मध्यविन्दु १५ स्थितमा एउटा र  भुताहा पोष्टको तीन किलोमिटर उत्तरतर्फ कलकट्टा टापु भन्ने कोर एरियामा एउटा गरेर दुई वटा गैँडा मृत फेला परेको सूचना अधिकारी मगरले बताउनुभयो । बाढीले बगाएर मृत्यु भएको अनुमान गरिएको उहाँको भनाई छ । यस बारेमा विस्तृत जानकारी  पोष्टमार्टमपछि भोलि मात्रै थाहा हुने समेत उहाँले जानकारी दिनुभएको छ ।
नवलपुरको कोल्हुवामा वर्षेनी गैँडा संरक्षणका लागि फुटबल प्रतियोगिता हुँदै आएको छ । तर पश्चिम सेक्टरमा मृत्यु हुने आधिकांश गैँडा भने मध्यविन्दुमै फेला पर्छन् । अघिल्लो वर्ष चोरी सिकारबाट समेत यहाँ गैँडा मरेका थिए ।
प्राकृतिक कारणबाट समेत  यसै क्षेत्रमा गैँडा मर्ने गरेका छन् । गैँडाको संरक्षण भन्दै चेतना मुलक फुटबल खेल खेलाउँदै गर्दा दिनहु गैडाको मृत्यु हुनुले नाम मात्रकै संरक्षण भन्दै कतिपयले टिकाटिप्पणी समेत गरेका छन् ।