मध्यविन्दुका बाढी प्रभावितलाई असल छिमेकी नेपालद्वारा १५ लाख बढीको राहत सामग्री सहयोग

ज्ञानु पंगेनी / प्रकाश रेग्मी  , कावासोती । नवलपुरको मध्यविन्दु नगरपालिकामा बाढीबाट प्रभावितहरूका लागि विभिन्न सङ्घसंस्थाहरूको राहत सहयोग आउनेक्रम जारी  छ ।
यसैक्रममा बुधबार ( आज ) असल छिमेकी नेपालले बाढीबाट प्रभावित परिवारका लागि विभिन्न सामग्री सहयोग गरेको छ । संस्थाले खाद्य सामग्रीहरू चामल , दाल , नुनतेल , चिनी , चिउरा , चियापत्ती , सोयाबिन  लगायतका सामग्री सहयोग गरेको हो । भने   साबुन , टुथपेस्ट , सेनेटरी  प्याड, ब्ल्याङ्केट  र सुत्केरी महिला र बच्चाका लागि आवश्यक पर्ने सामग्री सहयोग गरेको असल छिमेकी नेपाल नवलपरासीका एरिया इन्चार्ज पुरन सोतीले जानकारी दिनुभयो । संस्थाले  १५ लाख बढीको सामग्री  सहयोग गरेको सोतीले बताउनुभयो । संस्थाले विपदमा परेकालाई विगतदेखि नै  राहत सहयोग गर्दै आएको बताउँदै सोतीले  बाढीबाट प्रभावितका लागि यसपालि पनि सहयोगलाई निरन्तरता दिएको बताउनुभयो । विगतका वर्षमा मध्यविन्दु नगरपालिकामा  कृषि क्षेत्रमा आफ्नो परियोजना सञ्चालन गरेको थियो ।
मध्यविन्दु २  मा एक कार्यक्रमका बीच मध्यविन्दु नगरपालिकाको समन्वयमा राहत सामग्री वितरण समेत गरिएको छ ।  असल छिमेकी नेपाल र हङ्कङबाट गगन गुरुङसहितको टिमले सहयोग गरेको राहत सामग्री मध्यविन्दु नगर प्रमुख भिमलाल अधिकारी , उपप्रमुख पूर्ण कुमारी चौधरी , वडा अध्यक्ष रमभक्त अधिकारी सहित सहयोगी संस्थाका प्रतिनिधि सहितको सहभागितामा वितरण गरिएको हो ।
कार्यक्रममा बोल्दै नगर प्रमुख भिमलाल अधिकारीले  भुतहाका डुबान पीडितलाई नयाँ क्षेत्रमा व्यवस्थापन  गरी घर बनाइदिने प्रतिवद्घता जनाउनुभएको छ । कार्यक्रममा बोल्दै अधिकारीले सधैँ डुबानमा परेर बस्नु भन्दा  अन्यत्र  उचित स्थानमा व्यवस्थापन गरि व्यवस्थित गरिकाले राख्ने बताउनुभयो  । ‘दशैको मुखमा पालिकाको करिव ४५० घर डुवान भयो , कृषि पशुपन्छी तथा अन्नबालीमा करोडौँको क्षति भए पनि मानवीय क्षति हुनबाट बचाउन सकियो , चाड पर्वको बेला कोही पनि   भोकै बस्न नपरोस् भन्ने सोचको साथ काम गरिरहेका छौँ ।’   अधिकारीले भन्नुभयो ।
प्रभावित परिवारका तुलसी बिकले बाढीले सबै क्षति गरेर खानबस्न कसरी व्यवस्थापन गर्न भन्ने चिन्तामा भएकालाई  नगरपालिकाले समन्वय गरेर आवश्यक सबै कुरा उपलब्ध गराएकोमा धन्यवाद दिनुभएको थियो । ‘दशै आउन थालेको थियो । डुबानले धेरै समस्यामा परर के खाने के लगाउने  भन्ने स्थितिमा आएको थिए । तिन दिन स्कुलमा बसेम,  पालिकाले त्यै खाना खुवायो । अहिले चाडपर्व मनाउन पुग्ने खाद्यान्न दिनु भएको छ । त्यसमा खुसी लागेको छ ।’ बिकले भन्नुभयो ।